英國《租客權益法》生效後，唔少業主都決定放盤，但係放咗幾個月都無人問津，然後歸咎市場差、買家少。但根據小弟嘅日常業務同資料搜集後發現，問題往往唔係市場，而係兩個業主最容易忽略嘅陷阱：定價錯誤，同埋「連租約放售」嘅策略不再有效。

逾4成放盤賣唔出　罪魁禍首係邊個？

過去三年英國有44%嘅放盤最終冇成交：即係每兩個放盤，就有接近一個賣唔出。背後原因唔係市場淡靜，而係定價問題。

數字好直接：每放高過市場水平5%，成交機會率跌5%；放高10%，成交機會率跌10%。而2026年第一季，英國平均成交價比放盤價低3.5%，即係£18,800。換言之，大部分業主都係放高咗先，再減價成交，但呢個過程往往要幾個月，白白浪費時間同機會。更值得留意嘅係，有34%嘅未成交業主事後承認定價定高咗，但喺放盤當時以為係合理價。仲有21%嘅業主係用「我需要幾多錢買下一個
單位」嚟決定放盤價，而唔係根據市場實際水平。呢個思維陷阱非常普遍，尤其係海外業主——你需要幾多錢，同個單位值幾多錢，係兩件完全唔同嘅事。

小弟見過唔少業主客犯呢個錯：代理估價估高，業主一聽開心。簽咗獨家合約後，放盤三四個月無人出價，最後要減價吸客，蝕嘅唔只係差價，仲有時間成本同持有期間嘅按揭同管理費。

連租客放售　而家反變劣勢？

另一個小弟呢兩個月發現：帶有租客嘅放售盤（tenant-in-situ）大幅減少。過去兩年，英國帶有租客嘅放售盤數量跌幅接近一半，由12,423個跌至6,973個。表面睇係「業主唔急住賣」，但背後更重要嘅訊號係：無論係投資者定自用買家，對接收現有租客都愈來愈抗拒。

對投資者買家嚟講，《租客權益法》生效後收樓難度大增，新業主若接手有租客嘅單位，等同繼承咗前業主嘅租客關係，但新業主或佢信任嘅代理冇親身審查過呢個租客，萬一租客出問題，想收樓極之困難。因此，而家愈來愈多投資者寧願買空置單位，自己做盡職審查、自己揀租客，唔願接手「唔知底細」嘅前租客。自用買家買嚟自住，有租客喺度根本係障礙，買家必然要求清租先成交。

換言之，以前「有穩定租客＝即時現金流＝對投資者更吸引」嘅邏輯，喺新例下已經唔再成立。如果你而家諗住「連租約放售」，要先想清楚：個租客係助力定阻力？背景清唔清晰、租約條款透明唔透明，直接影響買家信心同最終成交價。

小弟點睇：放盤要迎合市場　舊思維未必再啱用

唔係市場差，係我哋要對市場有準確嘅理解。英國整體成交量喺2026年仍然穩定，需求係有嘅，問題係個盤有冇喺正確價位、正確狀態出現喺買家面前。定價係放盤最重要嘅決定，沒有之一。放高咗唔係「留返空間俾人還價」，係將準買家嚇走，令個盤變「過期盤」。《租客權益法》生效後，「連租約放售」呢個策略亦要重新評估。簡單講，市場因為《租客權益法》已經變咗，舊有嘅假設未必再成立。

放盤唔係等運到，係策略。如果你而家正考慮放售，或者唔明點解個盤掛咗咁耐都無人問，不妨聯絡小弟傾下！

Jackey YEUNG（英倫管家仔）：

Jackey 專注於英國房地產投資策略，長期為業主與投資人提供具前瞻性的市場分析與實務建議。Jackey曾任商業財經新聞記者，藉財經背景與市場觀察力，將政策、數據與趨勢轉化為投資建議。透過結合新聞專業與第一手市場資訊，協助讀者在瞬息萬變的英國房地產市場中，做出明智決策。

[編輯/邀請/合作/垂詢/業績會議/投資者簡介會]立即電郵聯繫：editorial@tastymoney.hk