英國房地產呢兩個月可以話係大洗牌，無論係業主、買家定係租客都有唔同嘅心態調整甚至計劃轉變。《租客權益法》生效，市場上出現兩極化嘅現象：有人話租金開始跌、市場放緩；又有人話租盤供應緊張程度係四年新高，租客搶盤激烈。

到底升定跌？小弟根據日常市場觀察同資料搜集，今次同大家詳細拆解呢個表面矛盾。

全國租金放緩，但倫敦係例外

綜合小弟手上嘅數據嚟睇，4月份英國全國平均月租輕微下跌，按年升幅只有1.7%，係近一年最慢，唔足去年同期4.5%嘅一半。跌幅最明顯係北英格蘭一帶，部分地區按月跌幅超過2-4%。不過，倫敦嘅走勢完全唔同。4月倫敦平均租金按月升1.3%，按年升4.8%，係全英升幅最高嘅地區。倫敦租盤平均空置期只有17日，比全國平均24日短足一個星期。

換言之，全國租金放緩，但倫敦市場仍然係逆市上升。

小弟最近有個客喺西倫敦有個兩房單位，4月尾租客搬走，重新放租定價£2,200。放盤後不足兩個星期，收到三組租客查詢，最終以£2,250租出！對比全國租金下跌嘅新聞，呢個結果係好多業主意料之外，但係倫敦西區嘅真實狀況。對港人業主嚟講，呢個分別非常重要。好多人持有嘅係倫敦物業，全國數字嘅放緩並唔直接反映倫敦嘅實況。

供應緊張四年新高，背後原因係咩？

小弟日常出入唔同分行接觸客戶同倫敦不同地區嘅團隊，明顯感受到倫敦租盤供應愈來愈緊。數據亦反映咗呢個觀察：2026年第一季倫敦放租盤數量比五年平均低15%，每個新放租盤平均有超過5組租客競爭，係2022年以來最高水平。

背後原因係《租客權益法》生效前夕，部分業主選擇放售物業或者趁機收回單位，令租盤供應進一步收縮。供應少咗，租客選擇少咗，留低嘅業主議價能力反而更強——呢個係小弟之前強調嘅「氣流」效應：離場者騰出嘅空間，正在被留守嘅業主承接。小弟最近有個客喺Canary Wharf附近有個一房單位，原本擔心新例影響，一度諗住放售。小弟同佢分析過區內供求後，佢決定繼續放租。單位4月中放盤，定價£2,300，放盤後八日收到四組查詢，最終以£2,350租出。

佢事後同小弟講：「其實租務市場根本唔係想像咁差。」

值得留意嘅係，倫敦核心地段嘅情況略有不同。因為銷售市場疲弱，部分豪宅業主改為放租，令高端市場供應相對寬鬆，租金升幅只有約1%，低過外圍倫敦嘅3%。

小弟點睇：現時為過渡期　市場係重整非崩潰

點解兩種聲音會同時出現？小弟認為：4月份嘅租金放緩，係市場喺新例生效前最後一個月嘅觀望狀態，業主同租客都喺等待新規嘅影響明朗化，唔係真正嘅需求崩潰。呢種「靜止」係暫時性嘅，唔代表市場基本面轉差。

而家新例已經生效，市場下一步會點走？小弟睇兩個可能：如果業主繼續離場，供應進一步收縮，租金有機會重新上升；如果業主留守並合理定價，市場會喺新框架下重新穩定。無論邊個情況，倫敦租盤需求嘅基本面冇改變過：人口密集、工作機會集中、住屋供應長期不足。

小弟做咗咁多年，見過唔少業主因為睇到某啲數據就做錯決定。

英國租金跌嘅新聞出嚟，好多持有倫敦物業嘅業主即刻慌，但實際上倫敦嘅供求根本係另一回事。現時倫敦租務市場雖然係過渡期，但基本面冇變：供應緊張、需求穩定、租客選擇少。新例帶來嘅不確定性係短暫嘅，市場最終會重新找到平衡。恐慌離場嘅業主，正在將自己嘅優勢拱手相讓；留守並且部署清晰嘅業主，反而係呢個過渡期最大嘅得益者。

如果你而家想了解更多自己物業個區嘅租金走勢，或者唔知新例下點樣部署，不妨聯絡小弟傾下！

Jackey YEUNG（英倫管家仔）：

Jackey 專注於英國房地產投資策略，長期為業主與投資人提供具前瞻性的市場分析與實務建議。Jackey曾任商業財經新聞記者，藉財經背景與市場觀察力，將政策、數據與趨勢轉化為投資建議。透過結合新聞專業與第一手市場資訊，協助讀者在瞬息萬變的英國房地產市場中，做出明智決策。

[編輯/邀請/合作/垂詢/業績會議/投資者簡介會]立即電郵聯繫：editorial@tastymoney.hk