英國樓以往既有投資者亦有自用買家，小弟平時寫嘅多係投資者角度，但其實近年比較多客係自用買家：有人係移居英國，有人係租咗多年終於決定入市。今次小弟用兩個真實案例，拆解自用買家揀樓時面對嘅取捨，背後反映嘅係而家倫敦樓市嘅一些現實。

案例一：方便定平靚新？

第一個客曾經居英多年，最近再移居英國，有心儀地區想入手自住，同時亦打算旅遊嘅時候做短期Airbnb放租。佢睇緊兩個盤：第一個係超過十年樓齡嘅二手樓，近火車站，出入方便；第二個係距離火車站需要15分鐘車程嘅全新樓，嗰區配套極少，只得一條巴士線往返火車站。

個客偏好方便，最理想係happy hour完輕鬆坐火車返屋企，加上做Airbnb考慮，近火車站對旅客嚟講亦係加分位。根據市場研究，倫敦距離火車站或地鐵站500米以內嘅物業，比1,500米外嘅同類物業貴約8%，以倫敦平均樓價計即係多出約£42,700。近六成倫敦居民每星期使用鐵路或地鐵超過一次，交通便利係倫敦買家最重視嘅因素之一。換言之，近站嘅物業唔只係生活方便，更係流動性同保值能力嘅保障。

新樓同二手樓各有取捨。新樓保養期少、設施新、建築標準較現代，但位置偏遠、配套不足，日常生活依賴單一交通工具，萬一班次有問題，影響極大。兩者之間嘅選擇，視乎買家最重視嘅係生活便利定係樓宇質素。

案例二：唔揸車嘅買家，選擇有幾多？

第二個客喺火車站附近租屋多年，終於決定入市，但係嫌火車站附近太貴，開始睇外圍少少嘅物業。問題係：佢唔揸車，變相令選擇大幅收窄。
呢個處境喺而家倫敦市場非常普遍。根據最新數據，2026年倫敦放盤量按年多13%，理論上買家選擇多咗，但對唔揸車嘅買家嚟講，「可選擇」嘅盤其實仍然有限——只要離開鐵路或地鐵覆蓋範圍，個選擇即刻大幅收窄。

Elizabeth Line（Crossrail）沿線嘅外圍地區係近年受關注嘅方向，部分地區喺2026年預計樓價升幅3-6%，係全倫敦最高嘅一批，主因正係交通升級帶動需求。呢類地區比火車站核心地帶平，但交通連接良好，對唔揸車嘅買家嚟講係一個值得留意嘅選項。

唔揸車唔代表一定要買貴嘅核心地段，但係交通覆蓋良好嘅外圍地區，始終比完全無交通配套嘅地方貴。呢個溢價係買緊生活質素同流動性。

小弟點睇：投資前代入自用買家去睇樓

兩個案例講嘅，係自用買家揀樓時面對嘅真實取捨：交通、配套、預算、生活習慣，每一樣都係決定因素。但小弟想講嘅，唔止係自住買家。

對投資者嚟講，呢兩個案例其實係一面鏡子。買英國樓投資收租，唔只係問租金回報或升值潛力，更應該去了解：「如果我係租客，我會唔會租呢個單位？如果我係自住買家，我會唔會買呢個單位？」

一個交通不便、配套欠缺、只得一條巴士線嘅新樓，可能呎價平、帳面回報吸引，但真正嘅自住買家唔會揀，有質素嘅租客都唔會揀。反過嚟，一個近火車站、生活方便、居英買家真係會考慮嘅物業，先係長線持有嘅優質資產——租得出、賣得返、唔怕空置。

投資英國樓，唔係純粹搵一個數字靚嘅盤，而係搵一個居英嘅真實買家同租客都會選擇嘅地方住。做到呢一點，先係真正嘅穩陣投資。如果你而家正考慮英國物業投資，或者唔知手上嘅盤係咪真係居英買家都會揀嘅選擇，不妨聯絡小弟傾傾！

Jackey YEUNG（英倫管家仔）：

Jackey 專注於英國房地產投資策略，長期為業主與投資人提供具前瞻性的市場分析與實務建議。Jackey曾任商業財經新聞記者，藉財經背景與市場觀察力，將政策、數據與趨勢轉化為投資建議。透過結合新聞專業與第一手市場資訊，協助讀者在瞬息萬變的英國房地產市場中，做出明智決策。

[編輯/邀請/合作/垂詢/業績會議/投資者簡介會]立即電郵聯繫：editorial@tastymoney.hk