英國首相施紀賢（Keir Starmer）上星期宣布辭職，成為英國十年內第七位落台嘅首相。消息一出，有業主即刻問小弟：「咁係咪會對英國樓有正面影響？點睇？」

唐寧街10號易主　新首相係邊個？

施紀賢辭職嘅消息公布後，英鎊輕微波動，但幅度有限。歷史證明，英國十年內已經換過七位首相，每一次政治動盪都有人話「樓市要跌」，但實際係利率、通脹、就業同供求，先係決定樓市嘅核心因素，唔係住邊個人喺唐寧街10號。

而家業主同買家最緊要記住一點：政治不確定性會令部分人觀望，成交量短期內可能輕微放緩，但唔代表樓價會再下跌。一個冷靜嘅市場，往往係精明買家嘅機會。
接替施紀賢嘅熱門人選係前曼徹斯特市長Andy Burnham，預計7月中正式就任。佢係一個有豐富城市管理經驗嘅政治人物，喺曼徹斯特任市長九年，期間曼城樓價升幅高達63%，遠超倫敦同期嘅7%。佢嘅施政風格係：大力推動房屋建設、加強租務規管、同時兼顧基建同地區經濟發展。

租務規管只會更嚴　業主要做好準備

Burnham係《租客權益法》嘅強力支持者，早喺2023年已經提倡多項最終納入新例嘅措施。更值得注意嘅係，佢喺曼徹斯特期間曾積極執法，向不達標業主發出罰款，四年間業主罰款總額升43%，達£147萬。

換言之，新首相嘅方向係：租務規管只會更嚴，唔會放鬆。對港人業主嚟講，而家就係時候確保自己嘅物業管理合規，唔好等政策進一步收緊先急手。

稅制改革係最大變數　Council Tax即將消失？

Burnham明確表態對而家嘅Council Tax同印花稅（Stamp Duty）制度不滿，形容Council Tax係「嚴重累退稅」。佢支持以土地增值稅（Land Value Tax）取代兩者——即係按物業現值嘅0.48%徵收年度物業稅。

以£50萬嘅物業計，每年要繳約£2,400嘅物業稅，相比之下，現行Council Tax一般係每年£1,500-£2,500，差距唔係很大。但對投資者嚟講，最敏感嘅係資本增值稅（Capital Gains Tax，CGT）：Burnham曾提出將CGT稅率與入息稅看齊，海外投資者最高稅率可能高達45%，係現行24%嘅接近一倍。

不過，小弟要強調：呢啲係政治主張，唔係確認政策。就算Burnham正式上任，任何稅制改革都需要時間諮詢同立法，唔會即刻生效。

北部城市受惠　倫敦影響相對有限

Burnham嘅施政重心係地區均衡發展，曼徹斯特、伯明翰、利茲等北部城市，好大機會受惠於更多基建投資同規劃鬆綁。佢亦承諾重啟HS2曼徹斯特段，對北部房地產嘅長線升值係正面訊號。

倫敦方面，Burnham嘅政策重心相對較少，而且倫敦嘅市場動力主要來自全球資金同本地供求，受首相更換嘅影響本身就比其他地區細。

政治係背景，市場仍然係主角

英國十年換七個首相，樓市依然運作。政治變天係背景音樂，市場嘅基本面：利率、供求、租務需求先係主旋律。

小弟嘅建議係：密切留意Burnham上任後嘅首份預算案，CGT同物業稅嘅方向，將係未來一兩年影響英國樓投資者最實際嘅政策訊號。如果你而家正考慮買入或放售，不妨聯絡小弟傾傾，計清楚而家嘅稅務同投資回報先！

Jackey YEUNG（英倫管家仔）：

Jackey 專注於英國房地產投資策略，長期為業主與投資人提供具前瞻性的市場分析與實務建議。Jackey曾任商業財經新聞記者，藉財經背景與市場觀察力，將政策、數據與趨勢轉化為投資建議。透過結合新聞專業與第一手市場資訊，協助讀者在瞬息萬變的英國房地產市場中，做出明智決策。

[編輯/邀請/合作/垂詢/業績會議/投資者簡介會]立即電郵聯繫：editorial@tastymoney.hk