去旅行，最頭痕嘅環節係咩？十個香港人九個會答你：Plan行程。睇遊記、爬文、開Excel整時間表，仲要同旅伴喺WhatsApp group無限loop「去呢度好唔好」——搞足成個禮拜，分分鐘仲辛苦過返工。
唔使再咁樣虐待自己！而家只要用AI幫手，你唔單止可以極速得到一份度身訂造嘅行程，仲可以叫AI幫你寫一個Web App網頁，再免費上架GitHub，手機一開就睇到晒所有安排、點到點導航、大家互相比錢唔知道最後要點清數？通通交曬比AI，1個Web App就可以滿足你所有願望！全程唔使識寫Code，淨係要你識得點樣「出聲」。
以下呢篇文章，小編將會以Gemini同Deepseek作為示範，結合自己嘅實測經驗，逐步教大家點樣借助AI嘅力量，安排一個舒適又順暢嘅旅行。
第一步：指令夠Specific，AI先交到貨
好多香港人試用完AI之後，覺得「都係咁啦，垃圾」，其實九成問題出喺指令太求其。你問「幫我Plan個日本行程」，同你問「幫我Plan一個七日六夜、大阪京都親子遊，每日最多三個景點、午飯後要安排小朋友休息時間、預算每人三萬港紙」——出嚟嘅答案，可以爭天共地。
一份靚嘅旅行提示詞，至少要包晒呢幾項：
| 項目 | 例子 |
|---|---|
| 同行人物 | 兩大一小（小朋友5歲） |
| 目的地+日數 | 東京，6日5夜 |
| 預算 | 總開支約人均三萬港幣 |
| 住宿偏好 | 近地鐵站、有家庭房 |
| 行程節奏 | 每日最多行8,000步，唔想轉車太多次 |
| 餐飲要求 | 想試地道嘢，但小朋友唔食得辣 |
小編Tips: 如果真係好怕行太多步，或者會換高踭鞋出去玩嘅朋友，不妨在指令中加入「行動不便，不能經常走路」、「穿着高跟鞋，不能經常走路」、「地鐵站中使用無障礙設施及出口」等要求，等AI可以更靈活調整形成及路線建議。
記住呢句口訣：「講得越清楚，AI越少Hea你。」
第二步：Fact Check埋先出發！AI深度搜索幫你揾出行程Bug
AI確實好叻，幾十秒就嘔到份靚靚行程出嚟，但你要記住：佢從來冇雙腳踏實地去過嗰個地方。 所以，當AI初步幫你定好個行程之後，千祈唔好就咁「收貨」——你一定要用AI嘅深度搜索（Deep Research）功能幫手做一次全面嘅「Fact Check」，確保份嘢係現實世界行得通。
呢個深度搜索功能，同平時簡單問答完全係兩回事。佢唔係求其喺網上爬幾篇文就算，而係會自動爬取過百個網站，將景點開放時間、交通所需時間、餐廳營業狀況等散落資訊全部串聯起嚟，再同你個初步行程做詳細比對。就好似有個研究所幫你做晒資料搜集咁，例如有旅行用家發現，Gemini嘅Deep Research會主動check到「某個景點因為花期提早咗已經關閉」，然後自動幫你改去另一個合適地方，甚至會因為「日照時間同行程唔夾」而幫你重新調整睇日落嘅時間。
呢個過程，重點在於幫你揾出AI「發開口夢」嘅地方。學術研究都證實，LLM生成嘅行程經常出現時序或空間上嘅矛盾，例如叫你同一時間喺兩個城市出現，或者俾一個極度唔合理嘅交通時間你。用深度搜索功能，就係要借助真實數據（例如航班需時、景點實際開放日子）去驗證每個細節，確保行程唔會得個「睇」字。
所以，記住呢個步驟：先用普通模式同AI傾出初步共識，跟手就開Deep Research叫佢做深入調查同修正。呢個動作，就係你由「信晒AI」變成「做佢老細」嘅關鍵一步。
喺編排行程呢一步，小編就選擇咗用Gemini幫手，除咗因為喺Google就可以用之外，因為目的地係東京，無論係日本商家定顧客等，都好習慣留言同update Google上嘅資訊，所以進行deep search嘅時候，資料會相對準確。
第三步：唔使識Coding，AI幫你寫好個Web App
處理好行程之後，就可以開始將佢變為一個網站。試想象下，只要你打開一個網頁，就可以睇曬今日天氣、今日行程、交通路線；甚至可以將所有預約詳情放埋喺度，夜晚返到酒店就打開記賬器幫自己mark數… …係唔係好幸福呢。
你以為寫網頁好難？而家只要同AI講一句：「請幫我寫一個旅行規劃助手HTML，要有輸入目的地、日數、預算嘅表單，同埋一個顯示每日行程嘅時間軸，設計要簡約，似旅遊雜誌風格。」——幾十秒之內，AI就會嘔出一份完整嘅HTML原始碼。如果你都識少少coding，亦可以叫AI幫你用指定嘅coding語言寫呢份html。
小編今次旅行，就比咗以下嘅原始指令AI：
我不會coding，幫我生成一個web app(HTML)，需要上載到GitHub，界面要像手機App一樣保持美感、排版與卡片設計，整體風格使用可愛日系，配色使用粉色系。功能如下：
1. 行程表
– 提供每日按鈕，將當天行程收納至按鈕之中
– 行程以日期命名2. 地圖
– 每個地點都需要插入google map導航連結
– 行程之間輔以文字性的交通說明，精確到從哪個出口離開3. 記帳功能
– 提供相互幫忙付款之後的結算計算功能，例如：A負責付了5000日圓的午餐，午餐是人均計算，B負責了晚餐的6000日圓付款，晚餐是按不同餐點計算，雙方在互扣以後誰應該付誰多少
– 記帳功能提供命名功能、總數付款方式、參與人數、誰負責付款、結算幣種（港幣或日圓），並提供雙幣種匯率展示
– 提供人均/分開付選項，當選擇人均時，直接將整數按參與人數整除；如是分開付，提供人名欄，輸入對應的應付款項
– 理帳有可能在多天以後進行，支援多天多項目處理功能，最後算出各自帳單，並提供「（A）應該付（B）xxx元」，以雙幣種形式顯示，A或B代入(人名)和（人名）
– 加入已結清按鍵，如該項目已結清，即可畫線，並在其後的統一結清功能中不再計算已經結清的帳目
– 提供最終帳單明細，保留每次結清的時間日期，並提供文字及圖片匯出功能4. 匯率計算器
– 提供日圓與港幣的雙向匯率換算5. 資料儲存與還原（重要！）
– 所有使用者輸入的資料（包括行程內容、記帳項目、結算歷史、當前選擇的日期、匯率設定）都必須自動儲存到瀏覽器的 localStorage
– 每次使用者進行任何操作（新增/編輯/刪除行程、新增/結清/刪除帳單、切換日期、上傳圖片、修改匯率）時，都要自動觸發儲存
– 頁面重新載入時，必須自動從 localStorage 還原所有資料，讓使用者無需重新輸入
– 在頁面標題或角落顯示儲存狀態（如「💾 已儲存」或「⚠️ 儲存失敗」），讓使用者知道資料是否安全
– 儲存時需包含版本號，方便未來升級時相容舊資料
備注: 經小編測試，目前記賬功能由於技術限制，只可以進行單機操作，即由同一人使用同一瀏覽器進行記錄，無法更換瀏覽器(例:Safari->Chrome)；亦無法由其他人更新賬單内容
嚟到呢一步，小編就使用Deepseek幫我寫code啦，主要係鍾意佢寫好之後，可以直接喺網頁運行preview個web app，如果有咩外觀、功能上嘅問題都可以即刻見到。上面嘅指令既然叫得原始指令，當然就一定會有需要改動啦，當你想修改嘅時候，就可以咁同AI講：
根據以上程式碼，幫我進行以下修改… …
然後清晰詳細地描述你想佢改咩、點樣改等等。要留意嘅係，當個程式碼修改得太多次，原有嘅功能有可能被誤改，所以到咗中途，小編就選擇咗另外喺Gemini度描述自己想要修改web app的甚麽功能，等Gemini教我點樣比指令Deepseek。同時都要有習慣，到咗一定嘅階段就要先保存一次html檔案，以免後期用唔返想要嘅功能。
第四步：免費上架GitHub Pages，全部團友都睇到
個HTML整好咗，但淨係喺你部電腦開到，點樣同旅伴分享？答案係用GitHub Pages，完全免費，仲要唔使俾Hosting錢。GitHub 簡單嚟講，就係一個 「程式碼嘅Google Drive」 ——不過佢唔止係存放檔案咁簡單，仲有埋版本管理同協作功能，全球超過一億個開發者都用緊。如果唔識用GitHub？都唔緊要，只要加多個指令比AI，同佢講：
「我係一個唔識寫code嘅人，請教我如何將程式上傳到GitHub。」
唔識寫code嘅小編實測，只要跟住AI嘅教學就可以順利上載到html並使用。
以後你去到邊，手機一撳條Link，成個行程表就喺你手。仲可以Share俾屋企人、旅伴，甚至放上Facebook群組呃Like都得。
指令懶人包
1. 行程初稿 (建議Gemini)
幫我Plan一個旅行行程，提供同行人物、目的地、日數、預算住宿、偏好行程節奏、餐飲要求
2. fact check調整(建議Gemini)
使用deep search 功能，(重新描述一次你的行程要求，並把初稿的行程表貼上)，使用deep search 功能幫我double check，並調整
3. 讓AI為你寫code(建議Deepseek)
告訴AI你希望這個web app有甚麽功能、外觀如何，越詳細越好，並附上行程：
我不會coding，幫我生成一個web app(HTML)，需要上載到GitHub，界面(描述)，整體風格(描述)，配色使用(描述)。功能如下…；行程如下…
測試使用後，如需要修改：
根據以上程式碼，幫我進行以下修改… …
如果你不會用GitHub，告訴AI：
我係一個唔識寫code嘅人，請教我如何將程式上傳到GitHub
出發前溫馨提示
第一，Check清楚真實性。 AI有時會「作嘢」——推薦間餐廳可能執咗，或者個景點開放時間同網上寫嘅唔同。出發前一定要上官網Double Check。
第二，預埋「走盞位」。 香港人Plan行程出名精準，但AI未必知當地實際交通狀況。建議每日預留兩至三小時嘅緩衝時間，唔使趕到甩轆。
第三，講細節。 如果你行唔到斜路、有食物敏感、要用輪椅，呢啲嘢全部要話俾AI知。你唔講，佢唔會問。
以前Plan一次旅行，閒閒地花你十幾個鐘。而家只要有AI幫手，你嘅角色由「辛苦爬文嘅規劃師」變成「出張嘴嘅決策者」——指令落得靚，HTML自動寫好，GitHub免費上線，手機一開就有專屬旅行App。
與其繼續忍受WhatsApp Group無限輪迴，不如今日就試下呢招。下次去旅行，你淨係需要擔心一件事：帶夠行李位買手信。
