大家好，小弟喺英國從事地產代理呢幾年，有幸與不同業主合作，為不少客戶管理或買賣英國樓。面對不同客戶嘅疑問同憂慮，小弟希望可以透過Tasty Money平台，每個星期同大家分享一啲最真實貼地嘅英國樓投資實例，以及一啲喺英國做代理嘅樂與怒。大家放心，呢個專欄絕非報喜不報憂，亦唔會一味吹奏英國樓，最緊要係講人話。

要數近半年最Hit嘅英國樓話題，一定係舊年2025年10月通過咗嘅《租客權益法》（Renters’ Rights Act）。有業主客A先生，甚至由期待收樓放租，差啲變成想恐慌性蝕讓物業。喺小弟及團隊嘅努力下，單位僅花24小時已獲兩組租客按叫價出價，短短14日內即有租客入住起租。

出租市場咁火熱，點解業主咁擔心？到底呢個《租客權益法》係咩牛鬼蛇神？

其實，呢個法案將分3個階段推出，第1階段將於今年5月1日開始實施！單純以投資角度出發，第一階段將會有以下重點：

•⁠ ⁠「無過錯驅逐」（Section 21）正式廢除，業主收回物業須提出明確理由。
•⁠ ⁠所有租約將改為「滾動制」，租客可隨時提前兩個月通知搬出。
•⁠ ⁠租約首12個月內不可出售物業或收回物業自用，並須提前4個月通知租客。
•⁠ ⁠如未能成功出售，12個月內不可重新出租或放盤。
•⁠ ⁠禁止租金競標，並限制預收租金金額。
•⁠ ⁠每年只能調整租金一次，升幅須符合市場行情，並提前兩個月告知。

部分業主想跳船　租盤更供不應求

由法案只聞樓梯響，到去年10月正式塵埃落定，不少業主都叫苦連天，部分更向小弟表示憂慮或不看好英國樓市，委托小弟放盤盡早離場。他們的其中一個最大憂慮是，租金調整將受限制，甚至會被鬧上法庭。

事實上，本身較少業主會一年加幾次租。其次，尋找新租客往往會出現空置期，有時業主即使成功加租亦得不償失。以往亦有不少租客為求安穩，都會提出簽訂兩年甚至三年的合約，合約期內租金不變。《租客權益法》新例下，雖然業主加租看似更難，但原來事實卻並非如此：業主每年可按市場價格調整租金，唔再受困於租約的年期限制。業主只要透過代理獲取市場數據，就可以合法地調整租金。

根據市場預測，約有超過3成的英國私人業主計劃減持，其中16%更有意全面退出出租市場。若預測屬實，代表英國物業市場短期內將會收緊租賃供應，供不應求的情況下，租金上升亦是合理現象。新例無疑為市場帶來變化，但卻絕非英國樓市的末日。

以上述嘅A先生為例，今次層樓嘅投資淨回報率（Net Yield）逾5%。雖然整體回報率未算最好，但勝在迅速出租，避免空置期，回報自然有保證。

A先生物業出租後，佢除咗問有關加租嘅問題外，亦有啲擔心他日要出售物業將會更困難。事實上，在新法規下，業主只要在租約生效12個月後，即可要求租客在4個月後搬出。如有買家嘅預算與業主預期的出售價相近，專業的代理自然會安排睇樓，甚至為現時租客尋找新租盤，咁就買家、賣家、租客三方都「三蠃」，一石「三」鳥。

Jackey YEUNG（英倫管家仔）：

Jackey 專注於英國房地產投資策略，長期為業主與投資人提供具前瞻性的市場分析與實務建議。Jackey曾任商業財經新聞記者，藉財經背景與市場觀察力，將政策、數據與趨勢轉化為投資建議。透過結合新聞專業與第一手市場資訊，協助讀者在瞬息萬變的英國房地產市場中，做出明智決策。

[編輯/邀請/合作/垂詢]立即電郵聯繫：editorial@tastymoney.hk