好多業主買完英國樓想出租或出售，第一個反應係：「多搵幾間代理幫手放，咪多啲人睇？」聽落好有道理，但小弟有客因為呢個想法，放盤放咗幾個月都無人問津，仲搞到代理關係一團糟。點解？

香港地產市場獨家代理（Sole Agent）同多家代理（Multi Agent）分別唔大，大家都係放上俾唔同嘅代理，鬥快鬥高價。

英國唔同，揀錯合作模式隨時俾多幾千鎊佣金之餘，仲可能得唔到最好嘅報價。今次小弟同大家拆解兩者分別，睇清楚先決定。

獨家定多家　分別唔止係「佣金」

獨家代理即係你只委託一間代理放盤，佢有你物業嘅獨家代理權，佣金一般係放售樓價嘅1.5至2.5%＋VAT。多家代理即係同時委託兩間或以上代理，邊間成交就收佣，但佣金會高啲，放售一般則3至3.75%＋VAT。

即係話，多家代理唔係「免費多幾個人幫你做嘢」，係你俾多啲錢買多幾間代理嘅服務。再者，本地買家都知Multi Agent要俾多啲佣，選用多家代理就可能令買家以為業主想盡快脫手，間接令買家覺得自己有更大議價空間。

獨家代理知道自己全權負責你個盤，動力完全唔同：佢可能會主動做open house、聯絡投資者、甚至為你盤度身制定推廣策略。

更重要嘅係，獨家代理能夠掌握最全面嘅買家回饋，例如過去一星期有幾多組客睇樓，幾多個出offer等等，代理可以完整地分享俾業主。

本文一開頭提及嘅業主客搵咗三間代理放售，但相片質素參差、樓盤資料不一，仲有兩間用唔同價錢放同一個盤，令買家混亂甚至起疑。

多家代理有咩著數？

唔係話多家代理冇好處，以下幾個情況值得考慮：

1. 罕有或者高端物業：唔同代理各自接觸唔同買家網絡，例如一個代理專攻本地客，另一個專攻海外投資者，兩邊同時出擊，覆蓋面真係大啲。若兩間都係同一類型嘅代理，效果唔會有太大分別。
2. 獨家代理無起色：一般獨家代理試足8-12星期，都無人問、無offer，就係時候考慮換策略。多家代理可以算係一次reset，重新引起市場注意，總好過死守一間代理。
3. 區內競爭特別激烈：如果個盤喺新發展區，周圍同類型新盤多過你，單靠一間代理好難突圍。多家代理可以確保你個盤喺多個渠道同時曝光。不過定價策略同listing質素更加重要，唔係靠多家代理就解決到根本問題。

多啲人幫手放盤 有機會適得其反 睇清楚先再決定

獨家代理同多家代理各有優劣，無絕對答案。一般情況下，獨家代理先行，俾足8-12星期，定期同代理跟進；真係無起色，先考慮轉多家代理。唔好因為「多啲人幫手」嘅心態一開始就撒網，最後佣金俾多咗，仲可能「幫倒忙」。如果你對選用獨家代理定多家代理有任何疑問，歡迎透過Tasty Money聯絡小弟！下星期再續。

Jackey YEUNG（英倫管家仔）：

Jackey 專注於英國房地產投資策略，長期為業主與投資人提供具前瞻性的市場分析與實務建議。Jackey曾任商業財經新聞記者，藉財經背景與市場觀察力，將政策、數據與趨勢轉化為投資建議。透過結合新聞專業與第一手市場資訊，協助讀者在瞬息萬變的英國房地產市場中，做出明智決策。

[編輯/邀請/合作/垂詢/業績會議/投資者簡介會]立即電郵聯繫：editorial@tastymoney.hk