《裝個免費App收6000美金？》
如果我同你講，幫人裝一個免費嘅AI軟件，竟然可以做到年薪過百萬美金，你信唔信？
喺2026年嘅今日，美國三藩市灣區有一班IT佬，正正就係靠「上門幫人裝App」，每次收費高達6000美金，即係接近5萬港紙！而喺深圳，連科技巨頭騰訊都要喺總部大樓出面擺攤，免費幫街坊呀、呀婆呀伯裝機，條龍由2歲排到60歲，墟冚過新年排隊逗利是。2026年其中一樣最hot、全世界都瘋狂講緊嘅，就係佢—「龍蝦」
唔係呢隻龍蝦，係呢隻OpenClaw小龍蝦。
我呢條片會話你知，OpenClaw到底係咩何方神聖， 背後隱藏住一條點樣嘅千億產業鏈。呢場「全民養蝦」熱潮，俾幾千蚊搵人代裝嘅人，到底真係買到生產力，定還是純粹俾人當水魚咁劏，只係一場荒謬嘅大型實驗？
《AI幫你打工：從動口到動手》
要了解OpenClaw點解咁紅，我哋首先要搞清楚佢同本身我哋用緊嘅AI有咩分別。
BTW, 我喺YOUTUBE會出條片，同埋記得打開鐘仔，Subscribe 我哋Channel。
過去2,3年，大家最熟嘅肯定係ChatGPT、Deepseek、Gemini、Claude呢類「對話式AI」，即係LLM，大型語言模型。你當佢哋係一個好聰明嘅顧問，你問佢答，幫你寫文、做powerpoint、寫essay，天文地理佢都可以同你傾。傾完，佢就唔會記得你係邊個。加上顧問始終係顧問，佢得把口，最後落手落腳打字、撳mouse工作嗰個，依然係你。
但係由奧地利開發者Peter Steinberger喺2025年底發起嘅OpenClaw就完全2個層次。
OpenClaw小龍蝦之所以叫小龍蝦，係因為佢個Icon成隻龍蝦咁。佢係一個開源嘅AI Agent，亦即係Agentic AI。
簡單嚟講，佢係一個萬能管家，有長期記憶，佢會記低你所有習慣，你同佢講過咩、做過咩，佢用晒檔案記住。今個禮拜你叫佢Backup相去「畀阿媽」個Folder，下個禮拜再叫佢做，佢自動自覺就會去返同一個位。
話晒係萬能管家，佢就要有晒你成間屋嘅鎖匙。即係OpenClaw會攞到你部電腦嘅「操作系統權限」。
傳統LLM睇唔到你個Desktop，你問佢我Desktop張相係咩，佢只會話「我無法訪問你的設備」。但OpenClaw，只要你畀權限同指令佢，佢真係會郁手做嘢——直接好似一個隱形人咁，開你Folder、睇你相、改你File，甚至自動打開你用緊嘅Chrome瀏覽器，自動郁隻踎鼠去search嘢，自己開Excel入data、過數、幫你入航空公司網頁幫你搞埋登機手續等等。
呢種由「動口」變成「動手」嘅範式轉移，短短幾個月就喺GitHub狂攬超過26萬粒星，被業界封為「新一代超級AI」。無數老闆同科技迷睇到流晒口水。
一個有晒你習慣、有你屋企鎖匙嘅管家，理論上完美，但實際上你知唔知你付出緊咩成本同代價呢？
《點安裝？高牆與商機：代客安裝產業鏈》
OpenClaw本身技術門檻高，絕對唔係你喺App Store撳個掣就可以「開箱即用」嘅消費級軟件。
普通用家要準備一部電腦，或者一個雲端，裝個Node.js、Copy and Paste Code去Command Prompt，去各大AI模型申請API Key，拿，海外工具API通常要用VPN先拎到，set up好基本嘢，駁落WhatsApp或者你用開既通訊軟件，打指令，成功嘅話，就可以叫管家幫你做嘢。但係對於一班連Router都唔識reset，開唔到電腦就會CALL IT嘅普羅大眾嚟講，以上呢啲簡直係讀哈佛先做到嘅事。
不過～ 邊度有痛點，邊度就有商機，有需求就有供應。既然你自己裝唔掂，咁咪俾錢搵人裝囉！於是，一條極度資本嘅「代客安裝」產業鏈就應運而生。
喺外國，有個叫SetupClaw嘅平台，明碼實價，幫你遙距set up隻龍蝦，收5000美金。如果你住喺三藩市灣區，要求工程師上門服侍，6000美金起！佢哋個創辦人仲牙擦擦咁話，單靠做「代裝服務」，今年已經穩賺過百萬美金年薪。
而家轉返嚟亞洲，內地嘅二手交易平台都湧現海量嘅「OpenClaw代裝服務」。例如閒魚、淘寶呢兩個主流平台，上面嘅代裝服務鋪天蓋地。遙距裝收100至200蚊人民幣不等，上門裝就300至800不等。有啲賣家為咗搶客，出埋「本地上門安裝，包埋幫你煮一餐飯」嘅啅頭。連京東JD.COM最近都推出埋遙距安裝服務，盛惠$399。呢股熱潮仲蔓延到香港，目前已經有香港本地公司推出相關代裝服務。
好，裝好機之後，惡夢先正式開始。
簡單指令，報天氣、整理下載Folder，甚至砌個網頁出嚟，對龍蝦嚟講都零難度。有啲嘢佢本身唔識，佢仲會自動自覺上網搵工具嚟裝，甚至自己寫一個出嚟！
但係無幾耐已經有人出post，WhatsApp同隻龍蝦嘅連線，會無啦啦因為程式錯誤成條線斷咗，用家要開返部腦，對住個Command Prompt慢慢Debug。
龍蝦個長期記憶同Skills系統，理論上愈用愈聰明，實際上係愈用愈多Bug。
有用家幫隻龍蝦Update去最新Version。點知一Update完，佢突然認唔到API，不停報Error。最後焗住成個鏟走，裝返舊版先正常返。
呢一個月，網上嘅龍蝦災難日日新鮮。
有「養蝦苦主」叫佢整理文件，佢理解錯指令，成個重要Folder畀佢Delete晒！救都冇得救！
有人信佢隻龍蝦好醒，叫佢幫手投資，最後蝕到喊！
仲有，你以為養蝦好平？硬件係平，但背後燒嘅Token先係無底深潭！網上高手分享，佢哋每個月燒幾百蚊美金係等閒事！因為佢每次做嘢，每次出錯再修正，都要Call一次API，燒一次錢！仲要因為佢有記憶，每次對話都要帶埋成個「回憶」去Call，Token消耗係一般Chatbot嘅幾何級數！
最核心嘅問題——安全！你請個有齊你鎖匙嘅管家返嚟，但佢係連住網嘅！如果你冇做好保安設定，你隻龍蝦就等如為全世界黑客大開中門！你系統入面嘅API Key、密碼、銀行資料，全部可以被人偷走。網上已經有人整咗個工具，掃到超過27萬隻暴露咗真實IP嘅龍蝦！呢個數字仲每秒鐘咁升緊！
《淘金熱中嘅賣鏟人》
問題嚟啦，既然成件事仲係咁多Bug、咁多風險，仲係咁多人養蝦呢？諗深一層，呢股「千人萬人排隊領養龍蝦」嘅熱潮，最大嘅得益者係邊個？
大家記唔記得科網股泡沫，又或者係電商啱啱興起嗰陣？淘寶都未有人識用，出面教人開淘寶店嘅培訓班就已經賺到盆滿缽滿。喺呢波OpenClaw淘金熱入面，真正賺到第一桶金嘅，唔係嗰班諗住用AI創業嘅普通人。而係背後嗰班AI巨頭，提供雲端伺服器嘅廠商、大模型API嘅供應商，同埋呢批做「代客安裝」嘅中間人。
我哋又用數據睇吓呢條產業鏈背後，到底邊啲企業真係「袋袋平安」。
首先係最核心嘅「大模型供應商」，因為OpenClaw每次幫你做嘢，背後都要消耗大量Token。喺港股市場，睇下隻(100.HK)MINIMAX，佢哋嘅M2.5模型係目前OpenClaw調用量第一；仲有(2513.HK)智譜，同埋(0020.HK)商湯，佢哋提供嘅多模態模型同算力，都係OpenClaw生態嘅核心。
其次就係「雲服務部署」。既然本地電腦裝咁麻煩又有安全風險，放上雲端咪得囉！各大科技巨頭已經睇準呢個商機瘋狂落場，養自家龍蝦。
騰訊(0700.HK)董事馬化騰宣佈騰訊推出全系「龍蝦」產品，如WorkBuddy、QClaw等，目前騰訊已經有「免部署小龍蝦」。佢仲話：「自研龍蝦、本地蝦、雲端蝦、企業蝦、雲桌面蝦，安全隔離蝦房、雲保安、知識庫……還有一批產品陸續趕來」。
百度(9888.HK)智能雲亦都推出「DuClaw」，主打「零部署」網頁端直接用，唔需要裝API Key，做到零門檻「養蝦」。遲啲仲會支援企業微信、釘釘同飛書。
華為都「套殼」，推出手機版「小藝Claw」處理文書，可以揀唔同人格，幫手搞文檔編輯、寫PPT同自動回email。
金山雲(3896.HK)同埋萬國數據(9698.HK)，呢啲提供IDC同算力基礎設施嘅公司，正正支撐住大規模嘅AI部署。
當然唔少得最底層嘅「算力同硬件」。無晶片，AI都係廢嘅。(0981.HK)中芯國際同(1347.HK)華虹，呢啲代工廠就直接受惠於AI晶片需求嘅爆發。
最後就係「AI應用落地」。
例如(9678.HK)雲知聲提供語音技能，(3317.HK)迅策就幫OpenClaw打入金融數據處理場景。
呢條由上而下嘅產業鏈，你睇下各自股價，就會知邊個係贏家。
總結
OpenClaw的確展示咗Agentic AI嘅潛力，長期記憶同檔案控制權，係傳統LLM永遠做唔到嘅突破。佢係一個好有啟發性嘅概念驗證。
但對於普通用家，佢絕對未準備好走入我哋嘅日常生活。
惡夢，從來唔係喺安裝嗰刻開始，而係當你真係開始用佢、依賴佢嘅時候，先慢慢浮現。硬件成本係低，但背後嗰個不停吸血嘅API費用，同埋要成日同佢搏鬥嘅精神損耗，絕對係一個無底深潭。
所以，如果你唔係專業開發者，又冇Budget每月燒幾千蚊港紙嘅Token錢，我真心勸你，唔好嘥心神去諗點裝OpenClaw。
AI永遠只係一個「放大效率」嘅工具。如果你本身嘅工作流程或者商業模式係零。咁「0乘以1000，結果依然係0」。
思考題：你覺得好似OpenClaw呢類可以「代你操作電腦」嘅AI Agent，最終會令到人類變得更加有生產力，定係會令人類變得更加懶，甚至完全失去工作能力，繼而真係令某Ｄ行業嘅白領，最終都係面臨失業嘅結局呢？歡迎去我哋YOUTUBE CHANNEL留言區分享你嘅睇法。記得Subscribe 我哋Channel。
[編輯/邀請/合作/宣傳/垂詢]立即電郵聯繫：editorial@tastymoney.hk
