最近幾個消息同時出現，令唔少持有英國物業嘅業主感到不安：倫敦核心區樓價急跌、新首相研究凍結租金、租務市場供應持續萎縮。今次小弟將幾個最新發展整合，同大家逐一分析。

倫敦樓價急跌　Westminster按年跌22.8%

倫敦整體樓價連續第九個月下跌，走勢同全國按年升2.7%完全相反。其中Westminster跌幅最驚人，按年暴跌22.8%，平均樓價跌至£836,000；Tower Hamlets按年跌14.5%；Hammersmith & Fulham跌10.9%；Kensington & Chelsea跌10.7%。

小弟要補充一點：Westminster嘅跌幅之所以咁驚人，部分原因係呢區高價物業交易量本身偏低，少量大單位交易足以拉低平均數。但係，背後嘅市場因素係真實嘅——高按揭利率令買家借貸成本大增，加上稅制改革吹緊風，唔少海外買家同本地富豪開始搬走資金，覺得英國「冇以前咁受歡迎」。

買家觀望情緒亦非常明顯。受高按揭利率同政局變動影響，今年夏天買家查詢量比上年同期大跌20%，成交量減少7%。由接受offer到完成交易，平均仍需超過17個星期。

稅制改革隱憂：豪宅稅、Homes Levy雙重壓力

稅制方面，有兩個發展值得業主密切留意。

第一，預計2028年生效嘅「豪宅稅」（Mansion Tax），針對£200萬以上物業，令唔少買高價物業嘅買家卻步，直接影響倫敦高端市場嘅流動性。

第二，新首相Andy Burnham一直倡議以「Homes Levy」取代現行Council Tax同印花稅。如果落實，估計為倫敦整體增加達£75億嘅物業稅負擔，對中高價物業業主嚟講係唔可以忽視嘅荷包威脅。

小弟要強調：呢啲目前係政策倡議，唔係確認立法。但市場已經開始因為預期而提前反應，呢個才係而家樓價受壓嘅核心原因之一。

新首相研究凍結租金，業主要做好準備

就喺樓價急跌嘅同時，租務市場出現另一個衝擊：新首相Andy Burnham上任後透露，內閣正研究推出私營市場租金凍結（Private Sector Rent Freeze），作為生活成本危機紓困方案嘅一部分。

政府目前研究嘅措施包括巴士車費補貼、能源賬單補貼，以及租金凍結，細節預計快將公佈。Burnham強調，呢個係40年來最大嘅政治同經濟改革嘅一部分，目標係將生活必需品置於更強嘅公共監管之下。

小弟想提醒業主：租金凍結唔係新鮮事，蘇格蘭早年曾試行，結果係部分業主因為回報受壓而索性賣樓撤資，令租盤供應大減，租客反而更難搵屋。如果英格蘭全面實施，歷史可能重演。

租務市場：供應緊張，每個盤平均8個租客競爭

即使係喺租金凍結政策未落實嘅情況下，租務市場已經係供嚴重不足。根據最新數據，5月份每個分行平均可供出租盤源跌至12.09個，每個放租單位平均有8名租客競爭。與此同時，放售市場明顯係另一個世界：每個分行平均可供出售盤源升至44個，潛在買家人數降至64人，市場愈來愈平衡，買家選擇多咗、議價空間更大。

小弟點睇：政策改變規則　市場仍決定價格

事實上，倫敦樓價下調、買家議價空間擴大，對有心入市嘅投資者嚟講係難得嘅機遇。但業主要清醒面對幾個現實：放售市場而家係買家主導，定價要貼市，唔可以用舊有心理價位去衡量而家嘅市場。

租金凍結如果落實，業主嘅租金增長空間會受壓，但同時租盤供應可能進一步萎縮，留低嘅業主反而受惠。稅制改革係長線隱患，而家係倡議階段，但要預早計算對持有成本嘅影響。

如果你而家正考慮買入、放售或者調整租務策略，不妨聯絡小弟傾傾！

Jackey YEUNG（英倫管家仔）：

Jackey 專注於英國房地產投資策略，長期為業主與投資人提供具前瞻性的市場分析與實務建議。Jackey曾任商業財經新聞記者，藉財經背景與市場觀察力，將政策、數據與趨勢轉化為投資建議。透過結合新聞專業與第一手市場資訊，協助讀者在瞬息萬變的英國房地產市場中，做出明智決策。

[編輯/邀請/合作/垂詢/業績會議/投資者簡介會]立即電郵聯繫：editorial@tastymoney.hk